Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд Үндэсний цэцэрлэгт хүрээлэн ОНӨТҮГ-аас ногоон байгууламжийн цогц сургалтыг есөн дүүргийн хэмжээнд олголоо. Үндэсний цэцэрлэгт хүрээлэн нь нийслэлийн ногоон байгууламжийн 23 хувийг бүрдүүлдэг бөгөөд, тус газрын мэргэжлийн мэргэшсэн инженерүүд энэ сарын 12-наас 25-ны өдрүүдэд дээрх сургалтыг танхим болон цахим хэлбэрийг хослуулан зохион байгуулав.
Нийслэлийн есөн дүүргийн Засаг даргын Тамгын газартай хамтран зохион байгуулсан уг сургалтаар модны үр бэлтгэх, тарьц суулгац бэлдэх, мод үржүүлгийн газар байгуулах, модыг хэрхэн зөв тарьж, арчлан ургуулах талаарх цогц мэдлэг мэдээллийг олгов. Мөн сургалтаар цэцэг, зүлэг тарих, ногоон байгууламж бүтээх, цэцэрлэгт хүрээлэн байгуулах төлөвлөлтийг хийх, ногоон байгууламжийн дөрвөн улирлын арчилгааны талаарх мэдээллийг дүүргүүдийн холбогдох албаны ажилтан, албан хаагчдад олгосноороо ач холбогдолтой юм. Тэрбум мод үндэсний хөдөлгөөнийг хэрэгжүүлэхийн тулд иргэдэд экологийн боловсрол олгох, удирдан зохион байгуулах хүмүүст мөн энэ талаарх мэдлэгийг олгох нь чухал. Тиймээс Үндэсний цэцэрлэгт хүрээлэн ОНӨТҮГ-аас цогц сургалтыг нийслэлээс гадна бүх аймаг, суманд зохион байгуулах зорилт тавьжээ.
Эх сурвалж: Нийслэлийн ИТХ-ын ХМОНХТ